Grímuverðlaun 2024 - besta barnasýning ársins

Grímuverðlaun ársins 2024 voru afhent í gærkvöldi við hátíðlega athöfn í Þjóðleikhúsinu. Fjölskyldusýning okkar Hollvættir á heiði hlaut þar verðlaun sem besta barnasýning ársins og okkur er efst í huga þakklæti fyrir þá viðurkenningu sem verðlaunin eru á okkar starfi ásamt þakklæti til Sviðslistasjóðs, Uppbyggingasjóðs Austurlands og Múlaþings sem gerðu þetta verkefni að veruleika með veglegum styrkjum.

Fyrst og fremst eru þessi verðlaun okkur í Sláturhúsinu hvatning til áframhaldandi uppbyggingar á atvinnuleikhúsi á Austurlandi og samstarfi við sjálfstæða leikhópa hvaðanæva af landinu. Okkar hlutverk í Sláturhúsinu er að byggja undir og styðja sviðslistir á Austurlandi bæði með framleiðslu á eigin verkefnum og einnig að taka á móti og sýna verk annarra sviðlistahópa. Leikhús og áhorfendur eru ekki bara á höfuðborgarsvæðinu, skyldur okkar leikhússfólks eru líka við landsbyggðina og þar vantar tilfinnanlega opinbert fjármagn sem styður leikferðir sjálfstæðra leikhópa og leikhúsanna um landið

.